咁啱CPU尋日搞咗個討論全球經濟嘅研討會，首席顧問劉兆佳畀記者捉住追問輸入內傭單嘢，佢即刻劃清界線，話冇份參與呢項研究，但承認依家只係做緊初步研究，跟住仲講咗「三未」，即係未研究完、未有結論，亦未向有關方面作出建議。咁講法，擺明係要為呢個燙手山芋急降溫啫！

佳叔仲話凡係市民關注嘅事項，CPU都會研究，依家有百幾項進行中，就算有啲課題研究完，都未必會提建議㗎！咁點解會爆出輸入內傭呢單嘢呢？佳叔作為阿頭，點解可以畀啲G亂咁將啲未成熟嘅嘢吹晒出街㗎，可見P:CPU內部都好立立亂喎！

同場仲有做過保安局局長嘅立法會議員葉劉淑儀，佢大潑冷水話建議牽涉居港權問題，而內地人來港居住滿七年就可申請居留資格，就算政府度橋限制內地家傭唔准留港，都唔代表解決咗問題，內地人照樣可以提出司法覆核，政府就要面臨司法挑戰，到時政府領功唔成，反而惹嚟一身蟻。