呢排港股做好，新股又排住隊上市，但港股升勢似乎欠缺支持，好多商界人士對入市仍抱謹慎態度。有玩開股票嘅「牛仔褲大王」楊釗都話，雖然香港經濟最壞情況已經過去，但前景仲未睇得通透，相信係虛火居多，所以佢仲未敢入市，繼續避風頭。佢唔敢入市，等於用行動對財金官員發表嘅「經濟曙光論」投下不信任票。
褲王透露，舊年金融海嘯爆發之後，佢都驚咗要「避一避」，事關佢自嘲冇技術，又冇膽量，唔夠膽貿貿然喺波濤洶湧嘅情況下入市。佢仲話依家旗下生意主要集中喺內地，主打房地產同零售業務，目前全國約有二千個銷售據點，規模相當之龐大，由於休閒服需求愈嚟愈大，所以休閒服飾成為重點銷售項目，反而幫佢起家嘅牛仔褲銷售比例，就縮減至兩成。