立法會復會在即，立會大樓又會再人頭湧湧，除咗議員嘅唇槍舌劍外，爭場地開會都可能出事。話說泛民主派逢禮拜五都會搞飯盒會，但立法會大房唔多，所以飯盒會都係喺201室搞，但舊年會期開波時，有個禮拜五就畀建仔搶先Book咗，搞到佢哋冇房「開飯」。
為避免同類事件再次發生，立法會秘書長Pauline吳文華日前出咗份通告畀全體立法會議員，提醒佢哋如果需要場地開會，要喺五個工作天之前就Book定先，唔使到時先嚟爭崩頭。另外，行管會仲開咗一次會討論，第日固定每個禮拜五嘅午膳時間，將立法會三間大房平均分配畀三個政黨，白鴿黨用C房、建仔用201室、富貴黨就用208室，等大家可以唔使爭。
但Pauline都提醒大家，立法會嘅大房珍貴，如果唔係用嚟處理立法會事務，就請大家另外搵地方喎！