政府高層每朝都會舉行早禱會，商討香港社會當日將發生嘅大事同政府嘅相應對策，會議一般由煲呔曾主持，若果佢放假或唔喺香港，就由負責署理佢職務嘅政務司司長或財政司司長依次序頂上。尋日煲呔曾已率先上咗北京，署理特首唐唐要去主持人民幣喺本港發債嘅記者會，鬍鬚曾又入咗院，最後輪吓輪吓，就輪到咁啱做咗署理財爺嘅傻強頂上，統領其他比佢更資深同更有經驗嘅問責局長開會。事件再次證明問責官員嘅署任制度真係妙不可言，好難用常理去理解。

或被迫留港冇得上京

傻強尋日除咗要幫三名老細頂更主持早禱會之外，仲要見記者解釋鬍鬚曾入院後港府嘅署任同運作安排，下晝又要趕去醫院探望鬍鬚曾，都唔知有冇時間處理佢原本嘅職務。須知鬍鬚曾嘅手術雖然相當成功，但斷估點都要休息番幾日至可以出院，傻強今次要頂幾耐更，真係冇人話得準。

其實傻強原定亦會喺聽日跟隨特區政府嘅觀禮團上京，由煲呔曾欽點留港主持大局嘅發展局局長林鄭月娥接波署任財爺，依家鬍鬚曾入咗院，政府可能會安排埋傻強留港穩定軍心，令佢冇得上京。不過話說回來，就算傻強繼續有得上京，佢一離開香港就要「跌呢」做番普通局長，冇得頂替鬍鬚曾上天安門城樓高高在上睇閱兵，即係嘢就有得你做，彩就冇得你攞，呢份替工認真難啃！