叮！政府周不時口口聲聲要「挽回藍天」，但藍天好似阿崩叫狗，愈叫愈走，空氣污染一日差過一日。依家嘅二氧化氮以及可吸入懸浮粒子濃度，過去兩年分別超標近兩成及四成，其中二氧化氮一年標準計算，每立方米至少超標十二微克以上！

如果班懶官以為只不過超標十幾微克問題唔大吖，咁就大錯特錯！吸吸埋埋，後果可大可小o架！

事實上，環境局最近提出嘅《空氣質素指標檢討》諮詢文件，十九招之中，有十二招同運輸及房屋局有關，局長鄭汝樺當然係責無旁貸。

巴士呢啲重型柴油車，咪係路邊空氣污染嘅罪魁禍首囉。以彌敦道為例，巴士已經佔咗交通總流量三成半。地球之友上月訪問過十九位喺彌敦道擺賣嘅報販，九成話路邊空氣質素惡劣或者變差，八成九指同巴士廢氣有關，四成二仲因此經常出現鼻敏感以及支氣管炎呢啲疾病。

弊在運輸及房屋局一直視而不見，話各相關部門已經實施咗一系列措施減少空氣污染物，一直有同巴士公司合作，提高巴士網絡嘅效率，減少交通擠塞同埋路邊空氣污染。

叮佢個鎯鎯，呢班懶官講就天下無敵，做就有心無力，墨魚車通街噴黑煙又唔理，只係閉門造車搞咗個「停車熄匙」計劃出嚟，話就話可以減低幾多乜乜廢氣、物物懸浮粒子，唔識嘅畀佢嚇死，識嘅就笑到碌地。

叮，香港夏天閒閒地都三十幾度，有環保團體發現上個月家居用電量破紀錄超過十四億度，估計因為氣溫實在太高，屋企唔開冷氣唔得。用電多即係排廢勁，政府又唔要求電廠減排。

仲有近日敲鑼打鼓引入嘅電動車，又係得啖笑。人哋外國推廣電動車，同時會推出相應措施，好似日本政府咁吖，會向電動車車主提供補貼，買電動車同買傳統車嘅價錢差唔多，電動車司機更加有泊車及隧道費優惠。反觀香港政府乜鬼配套措施都冇，車價又貴過人，周圍都搵唔到地方充電，邊度有人願做白老鼠吖。

叮佢個鎯鎯！中環、旺角、銅鑼灣等鬧市嘅污染指數長期爆燈，鄭汝樺唔好再龜縮喺冷氣辦公室喇，不如試吓好似環保團體建議咁，做一日報販，試吓人肉吸塵機嘅滋味，敢唔敢呀？