同是鬼節，中國人對盂蘭節百般避忌；西方的萬聖節，則被視為搵食搶客的一大節日。除了本港兩大主題樂園推出以萬聖節作主題的活動外，近年愈來愈多街頭店舖及商場，亦趁着萬聖節大搞氣氛，售貨員扮鬼扮馬，以「喪屍」、「女巫」等千奇百怪造型現身，有的更招聘臨時演員扮演科學怪人，務求嚇到顧客驚呼狂叫，增加節日購物氣氛。然而，「喪屍」、「女巫」、「棺材」，這些在成年人眼中，習以為常的萬聖節人物及布景，隨時令小童日後生活留下陰影。
患焦慮症頭痛嘔吐
「好多時家長見小朋友畀『鬼怪』嚇親，只係識同佢哋講：『使乜驚，呢啲係假嘅。』其實小童對於突如其來嘅驚嚇，同太恐怖嘅圖像，都好易被嚇親，嚴重嘅會患上焦慮症！」中大醫學院香港健康情緒中心臨床心理學家鄒凱詩表示，每十名九至十五歲的小童及年輕人，當中會有五名怕鬼，其中更有一人會因而患有焦慮症。鄒指出，患上焦慮症的小童，常會顯得很緊張、不安，又怕黑，更會常出現肚痛、頭痛及嘔吐的病徵。
曾在旺角街頭被喪屍造型打扮的售貨員嚇得拔腿狂奔的劉太兒子，正是典型例子：「我依家仲記得囝囝嚇到面青口唇白，眼紅紅嘅樣！」劉太憶述，年前就讀小六的兒子與父親在旺角街頭逛街，途經一間售賣裝飾品的店舖，突然一名戴上喪屍面具的售貨員，從後大力拍打兒子。兒子在毫無心理準備下，嚇得尖叫狂呼，更撥開父親雙手，拔足逃走：「個仔以後每次睇到殭屍、喪屍、鬼怪嘅造型物件，都會好不安，甚至乎閃避，佢仲話萬聖節係佢最討厭嘅節日！」
小一女生嚇到入院
同樣，劉太兩名友人的女兒亦分別被萬聖節的驚嚇宣傳活動「嚇親」而入院。去年萬聖節期間，劉太友人就讀小一的女兒，被商場內一名駝背鈎鼻、女巫打扮的職員嚇倒，返家後更出現嘔吐、發燒的徵狀，要入院治理。而她另一名朋友與就讀小學四年級的女兒，在商場閒逛期間，看見一隻滿布鮮血的鬼手正欲從棺材爬出，當時友人女兒被嚇至呱呱叫外，更喚起她對剛失去婆婆的不快回憶，即場向母親哭訴，擔心去世的婆婆會從棺材爬出來。
對於小童被店員的恐怖打扮嚇至情緒失控，醫學界人士認為當局必須正視，更應制訂指引，限制商店或商場向小童進行過分驚嚇或血腥的宣傳活動。
12歲以下小童高危
香港執業精神科醫生協會主席丁錫全指出，年紀低於十二歲的小童屬於易被嚇親的高危一族，他們對於鬼怪較為敏感，抽象思維仍未成熟，不懂分辨真假，容易將鬼怪誤以為真。
丁錫全指出，本港電影設有三級制評級，內容若帶有過分暴力或驚嚇成分，會禁止十八歲以下人士入場。然而，商場或店舖為萬聖節進行推廣活動時，當局卻沒有任何指引供店方參考，只能靠店方自我克制：「當局應該制訂指引，將活動嘅驚嚇程度分級，好似啲過分血腥同暴力嘅嘢，就唔好喺小童面前出現！」