做過煲呔曾家廚嘅于燕平舊年返蘇州子承父業，轉型做近代歷史說書人。佢話九○年初到香港，因得到華懋集團主席龔如心賞識，喺華懋旗下新雪園做廚，有次小甜甜老爺王廷歆呻話自己喺新雪園食飯冇得簽帳，返工要打卡，唔打卡冇錢收，搞到于半信半疑。但于話：「我識做呀，佢每日食飯二十蚊，我日日劏野生水魚，裙邊就燉畀佢食。」王廷歆連續食咗一個月，大讚好嘢，話「掂喎，食咗之後猛到不得了！」
小甜甜長居尖東華懋頂樓，佢憶述有次送飯畀小甜甜真係大開眼界，當時一位職員向佢問明來意後，「都唔知佢喺邊度按咗個掣，然後就聽到隆、隆、隆，後面幅牆慢慢打開，聽到入面傳嚟卟、卟聲木魚聲，當時龔如心喺度唸緊經。」
王德輝失蹤後，小甜甜長期食素為丈夫祈福，于燕平每日返工第一件事，就係為小甜甜整煲仔上海菜飯，指定唔准落肉，于覺得長期咁食一定口都淡埋，於是自作主張用煮翅嘅火腿老雞湯當水煲飯，小甜甜即食出有唔同，仲問經理係咪換咗廚？佢就係咁打爛咗小甜甜嘅齋缽嘞！