霍公子話年前出席一四年冬奧會申辦城市表決大會時，有日突然收到自稱係普京嘅電話，對方用英語話請佢到房間坐坐，佢半信半疑，最後都行去睇睇，點知房門一打開，果然係普京！佢拉住霍公子傾足一粒鐘，游說佢支持俄羅斯黑海小城索契辦冬奧會。霍公子冇講有冇賣人情，但俄羅斯最後的確贏咗。

至於一六年奧運，四個申辦城市包括美國芝加哥、日本東京、巴西里約熱內盧同西班牙馬德里連日嚟搏命拉票，到底霍公子會投畀邊個國家？佢摸摸頭皮笑騎騎咁話：「喺個肚度。」

總之佢十月一號晚橫掃北京各大活動同酒會後，就會即刻趕住坐凌晨兩點嘅飛機，坐十幾粒鐘長途機直奔哥本哈根開會場地，去到啱啱好夠鐘投票。