點解會泵脹自己？原來因為佢犧牲咗做運動嘅時間，少做運動咯，啲肥肉咪唧晒出嚟囉！

曾醫生尋日出席「世界心臟日」嘉年華時話，以前每個禮拜會約醫生朋友打番場網球或者羽毛球，但豬流感一爆就冇呢支歌仔唱，而佢又怕磅數勁升，於是決定每餐只食七成飽、食少啲肥膩嘢同食多啲菜，仲要飲多啲水，等個肚有飽嘅感覺，咁就可以食少啲嘞。雖然做少咗運動，佢屋企都有一套簡單健身器材，希望每日有半個鐘Keep fit，減番嗰幾磅。

同場嘅立法會醫學界代表「怪醫」梁家騮尋日出席活動前，同兩位醫生行完麥理浩徑第七段，佢話呢段路長十六公里，一般要行六個鐘至行得完，佢哋只用咗三個半鐘就行晒，仲可以返屋企沖完涼至去會場。怪醫即係讚自己健步如飛啫！