警隊嘅負面新聞多籮籮，前一哥阿Dick李明逵尋日出席活動時，教精現任警務處處長鄧竟成，話要正面面對負面新聞，仲好輕鬆咁講：「我以前做嗰陣都好多負面新聞啦，不過依家人人都唔記得喇！」
再追問佢會唔會作為前輩教吓一哥點處理呢啲新聞，佢本來耍手擰頭話：「佢一定識處理啦！我使乜教佢做呀！」但之後又語重心長咁話：「其實做一哥經常都遇到多元化嘅事，總有困難嘅時間，不過唔好怕困難，要正面啲睇。」鄧竟成不妨參考吓。
退休後嘅阿Dick好開心咁話以前公務繁忙，好少時間做運動，依家就多咗好多時間去游水、健身，而且每個禮拜都可以打三場網球。尋日同場仲有民政事務局常秘「肥師奶」尤曾家麗，佢同記者呻話做餐死都冇人知東亞運幾時開幕喎！