富貴黨尋日喺北角寶馬山搞咗個健康檢查日，由黨主席Miriam劉健儀同常委田北辰帶頭驗身，田二少就除襪驗吓有冇骨質疏鬆症，仲自爆話平日工作壓力大少做運動，兩年前做例行體檢先知心臟有一條細血管塞咗七成，拿拿聲通波仔，加上父母分別患有心臟病同肺癌，所以佢每隔三個月就由頭驗身驗到落腳，依家每個禮拜會堅持抽兩至三日做二十分鐘競步運動，保持心肺功能健康。
啱啱喺四川返港嘅Miriam亦趁機驗眼，佢亦直認患有高血壓，要長期食藥，每年驗身唔慳得喎。佢又大讚四川嘅水煮魚辣味十足夠正宗，吸引最食得辣嘅立法會議員李國麟大快朵頤。眾人仲品嘗四川水井坊名酒，佢話酒香撲鼻，好飲過國酒茅台添，可惜佢酒量一般，只係淺酌輕嘗，出名飲得嘅黃宜弘就飲到不亦樂乎。