尋日裕華國貨嘅印尼特產展開幕，介紹咗幾種新引入嘅印尼食品，包括高纖即食麵，同全球知名、俗稱「貓屎咖啡」嘅麝香貓咖啡，仲搵咗一班知名人士嚟試飲，當中包括經濟動力嘅立法會議員Jeffrey林健鋒。
貓屎咖啡出名香濃之外，仲出晒名貴，細細一包咖啡豆要成千幾蚊，一杯兩啖已經成百幾蚊。不過Jeffrey試完後就皺晒眉，話覺得味道太濃，苦得滯喎！
開幕禮後，Jeffrey收到一個印尼雕像做紀念品，上面有三個大小不一、蜷起身體嘅人，佢話雕像代表沉思咁解，好可能係叫人做嘢要三思喎！不過佢就頭痛個雕像擺喺邊。其實個雕像咁有意思，佢不妨擺喺經濟動力嘅辦公室度，等3L得閒一齊沉思吓，諗吓下屆選舉策略吖！
