做乜忽發奇想要引入內地家傭呢？消息人士指近年發生咗好多外傭同僱主爭執嘅事件，今年六月仲搞出人命，有個僱主喺屋企畀菲傭劈死，佢話呢啲問題好多時都係因為大家文化有差異而發生，如果僱主同家傭都係「自己人」，可以「同聲同氣」嘅話，咁就乜問題都冇啦！消息人士仲指輸入內傭可以幫到內地貧困一族搵多啲錢脫貧，實行一舉多得，事在必行咁話。

嘩！如果真係成事，全港女士第一時間企出嚟反對啦！容乜易老公搵個人返嚟「融入家中」o架！唔單止咁，家傭居港權都係個大問題，唔通想再搞多一鑊粥出嚟？

無視香港貧苦大眾

但消息人士話已諗掂晒所有對策，如果真係輸入內傭，首先就會設年齡限制，唔畀啲太後生嘅嚟香港；又會規定所有僱主搵內傭都要經中介公司，一定唔可以自己揀定人再申請，一嚟防止有人合法「運」個二奶落嚟，二嚟防止港人用呢招申請親朋戚友嚟香港變相移民。同埋佢哋又考慮緊對所有內傭加設最高工作年期，可能做滿六年就唔畀佢哋再喺香港做嘢，實行避過晒所有有可能造成嘅爭議。但世事係咪就係咁簡單，避過晒就冇事先？

中央政策組係咪異想天開呢？事關喺豁免外傭稅後，香港多咗成萬個外傭，一班家務助理已經好驚飯碗不保，如果他日內傭大軍殺到，咁咪即係又多班人搶飯碗？班香港婦女冇工開時係咪要攞綜援？

消息人士話依家請外傭都係幫嗰啲國家扶貧，不如幫內地扶貧。之不過，香港嘅貧富懸殊好嚴重，政府搞極都搞得唔好，點解呢班政府智囊唔諗吓橋照顧香港嘅貧苦大眾，反而諗埋呢啲頭痛醫頭、腳痛醫腳嘅方法呢？政府智囊嘅思維都係咁，唔怪得成個政府都係咁啦！