小白觀點
轉做日報大把捧場客
以為依家上緊嗰套《死神4來了》夠晒血肉橫飛、驚嚇度爆晒燈咩?No Way!如果你睇過醫管局公布嗰份《風險通報》,醫錯眼、剝錯牙、插錯喉、開錯藥,簡直血流成河,諗吓都毛管戙呀!
既然呢份《風險通報》咁多嘢睇,好心醫管局班高層發大嚟搞,唔好兩個月至出版一次,直頭改做《風險日報》仲好啦,相信應該幾暢銷㗎!醫護人員當然捧場啦,佢哋可以睇吓自己有冇上鏡嘛;至於病人更加唔買唔得,做手術前認吓主刀醫生有冇上過報,就算做完手術咁好彩行得番出醫院,都要追住買嚟睇,隨時有醫生刊登「手術時遺下手機一部」之類失物啟事,有薄酬o架。
網友觀點...X)...
[小肥]
聽見都牙煙,醫生都信唔過,醫錯眼都得,身份都可以對錯,有身份證㗎嘛,咁都錯?
[輝輝]
聽咁多醫療失誤,我都唔見有人負責任,醫管局冇監冇管,大佬呀,人命嚟o架,錯完當冇事,害死人o架!
[Cindy]
真係可以拍套戲,睇完一定唔敢入醫院。
[光仔]
醫生當病人實驗咁辦,乜錯都出齊,仲要病人自己承擔風險,有病真係慘,醫咗仲慘。
網址:www.sunsiupak.blogspot.com
阿豪觀點
打擊醫護士氣罪大惡極
《風險通報》期期有新料,唔係打錯針、輸錯血,就係割錯乳房,再唔係就索性留低幾件醫療用品喺病人體內。哈,話時話,唔知邊個改個咁傳神嘅名呢?《風險通報》,向邊個通報呢?梗係向病人通報啦—入醫院咁鬼危險,隨時冇命—唔通向醫生通報咩?反正又唔會有人因失誤而受罰嘅!唉,不過都係唔好講咁多喇,一陣人哋士氣受到影響,唔開心之下又做錯嘢,咪盞惡性循環!
作為一個文字工作者,見到香港嘅醫療事故無日無之,真係唔愁寫嘢冇靈感,終於知道乜嘢叫做「國家不幸詩家幸」嘞。不過呢種「幸運」建基喺病人痛苦之上,寧願冇好過咯!
網友觀點...X)...
[湯記]
哈,明明醫療應該係最專業最穩陣最唔錯得嘅嘢,唔知點解依家會頻頻出錯,呢類新聞愈睇愈心寒!
[匿名]
成日都有醫療失誤,每次就出嚟道個歉,話會懲處員工就算數,究竟幾時先至會有好啲嘅監管?
[客迭]
嗰個病人權益組織嘅人講得好:「切錯手腳之後用膠水可以黐得番咩!」
[森羅殿主]
醫管局不妨舉辦有獎競猜遊戲,估吓下一鑊醫療事故究竟係乜嘢,估中嘅就獎佢哋……長者醫療券5張啦!
網址:www.lukchiho.blogspot.com
發表方法
讀者如對本欄每日話題有任何意見,歡迎登入網址發表意見。本報保留採用刊登權利,不另通知,敬請留意。