香港的醫療事故層出不窮，明顯在制度上存漏洞，尤其管理層麻木不仁、死不認錯的一副嘴臉。筆者看ontv新聞台，那個港島東醫院聯網行政總監任燕珍出來「解釋」，漫不經心、毫無誠意，實在令人齒冷！大佬啊！你見緊記者出緊鏡，竟可目光游移，望向牆似在睇鐘，想急急腳走人的樣子，實在令人不敢恭維！佢一開口又夾着脷，一時話「意外事件，冇人為問題」，一時又話「總之，我哋承認有問題喇！有啲耽誤咗佢……」

如此前後矛盾，任燕珍，你估你係飯島愛啊，飯島愛喺佢本自傳留下一句名言──人生本來就是由矛盾組成的啊！事緣有人問她那麼恨她的爸爸，但又那麼想見到他，這不是很矛盾嗎？任燕珍一時話「冇人為問題」，一時又話「我哋承認有問題」，佢就係欠咗這一關鍵句：醫療事故本來就是由矛盾組成的啊！你繼續廢噏下去，醫療事故便變成醫療慶典，無人要負責，病人要鼓掌，快啲爭取加薪升職喇！

輪到周一鑊「解釋」，又係人肉錄音機。每一次當潮水退去時，就會發現有個孭到成身鑊的人形物體在「裸泳」！就快年年有醫療慶典啦，周一鑊又當選《國王的新衣》最佳男主角！