早排深水埗發現一個住喺山邊叢林十年有多嘅隱世阿伯，平時靠野果溪水維生，佢話晚年唔想靠政府、靠仔女，寧願隱居山邊唔使煩。

類似呢種隱蔽長者獨居偏僻郊野個案，近年愈來愈多，諗落都幾慘。試問邊個唔想晚年有瓦遮頭，過有尊嚴嘅日子，邊個會貪得意去學魯賓遜吖？最弊政府針對隱蔽長者嘅服務嚴重不足，難為班高官仲成日齋噏「老吾老以及人之老」，簡直不知所謂。

香港耆康老人福利會公布嘅調查數據真係嚇你一跳。調查顯示，有兩成七受訪者認為自己係隱蔽長者；超過半數人即使遇到困難或身體唔舒服，都唔會主動搵人幫手，理由係「費事麻煩人」；而覺得寂寞嘅長者居然有六成咁多。社工指出，隱蔽長者可能出現抑鬱同對抗社會行為，隨時變社會計時炸彈。

老人家勞碌一生，為家庭同社會貢獻良多，年紀大咗孤苦伶仃，叫天不應，叫地不靈，都唔好話唔淒涼。其實，隨着香港人口老化，老人問題唔係今日至出現，當局一直闊佬懶理，令到隱蔽長者問題愈來愈嚴重，簡直係「國際大都市」嘅恥辱。

令人擔憂嘅係，早排有調查發現，本港隱蔽長者可能多達九萬人，當中有四成半到六成存在情緒同長期病患，近半數每月收入低過綜援水平，但當中有八成半滿意自己嘅健康同經濟狀況，認為唔需要幫助，好明顯高估咗自身情況。

長者唔想麻煩人，就算身體唔妥都話「自己可以處理」，咁唔係表示佢哋唔需要人幫，而係證明政府提供嘅服務嚴重不足。公公婆婆求助無門，咪惟有自我隱蔽囉。長者七老八十仲要自己顧自己，班高官塊面紅都唔紅吓，臉皮都算厚咯。

仲有，政府用於長者嘅資源本來已經奀到痹，現有社區服務資訊又冇積極主動向老人家提供，令隱蔽長者嘅問題更加惡化。耆康會調查發現，超過七成受訪者話唔知道區內同長者有關嘅社會服務；冇使用或者參加過任何社會服務嘅，更超過八成六。叮！唔少長者行動不便，政府投放咗資源就翹埋雙手，老人家想唔做隱蔽長者都唔得喇。

政府「敬老」從來都係得把聲，經濟好嗰陣顧住益自己，環境差嗰陣又口爽荷包立，依家市道好番少少，煲呔曾即刻事先張揚話下個月發表嘅施政報告唔會「派糖」。旨意政府幫吓公公婆婆？慳啲啦。

老人家離群索居，班高官就關人個關，如果唔係政府隱形，香港邊會有咁多隱蔽長者吖。叮！