發展局局長林鄭月娥管轄嘅瓣數愈來愈多，雖然有名「好打得」﹐但佢尋日出席個場合時就變身「好呻得」，又話綠化唔易做、保護樹木有阻滯，甚至分區大綱同樓宇密度都有人反對，面對咁多阻滯，不過林鄭卻話冇有怕，反而安慰自己「有危先有機」添，因為做官三十多年嘅經驗係，有危機先係推動政策或者攞資源撥款嘅好時機。
林鄭尋日喺「都巿氣候與都巿綠化」研討會上致詞時，如數家珍列舉佢手上嘅工作同困難，佢仲爆料話，當年政府工程大減，土木工程拓展署冇嘢做先搞綠化，點知依家成為主力工作，仲預計會花十六億去做。娥姐講笑話，佢屬下班工程師「忠於學識，無論鍾唔鍾意都一定要做公眾諮詢」，即係話唔係有民意做後盾，都幾難過關斬將啦！
講到管埋樹木時，林鄭話，專業團體同關注人士只係掛住要求訂立樹木保護法，對樹木管理專責小組報告就唔多識欣賞，令佢好失望，嚟緊惟有做多啲宣傳、推廣，希望有多啲人支持啦。