城中名人第二代紛紛上位，全國人大常委范徐麗泰兒子范駿華（Andrew）近年喺青年團體好活躍，繼進身香港青年聯會核心後，最近牽頭成立滬港青年交流促進會，尋日仲舉行就職禮。但阿仔首場大騷，范太就冇現身支持，因為佢嘅大女凌華趁佢生日請佢去日本旅行。雖然係咁，范太都有喺幕後發功，尋日所見，范太嘅金蘭姊妹、前律政司司長梁愛詩現身撐世姪，仲有唔少上海官員添。
Andrew擔任主席嘅滬港青年交流促進會係香港青聯同上海青聯嘅長遠合作平台，頭炮大製作係為二○一○年上海世博會招募二千名香港青年義工，上海方面派出世博會執委會副主任周漢民等南下。
尋日詩姐現身，吸引咗大批傳媒到場問吓政圈中事。我哋問Andrew今次媽咪（范太）有冇幫手搵嘉賓，佢坦言，詩姐係經促進會正式邀請，但媽咪亦「有開聲」，佢跟住又加一句「Auntie Elsie（詩姐洋名）都識得我嘅。」其實范太本來都好想出席，但撞正生日旅行同上京睇閱兵，上海賓客又公務繁忙，最後Andrew決定「遷就客人緊要過遷就媽咪」。