今年雙春兼閏月，貿易發展局主席蘇澤光（Jack So）嘅大女國欣（Karen）尋日同任職高盛投資嘅同事兼男友羅康迪（Eric）拉埋天窗，日頭喺九龍塘聖公會基督堂行禮，傍晚再到香港會所舉行酒會，Jack So喺政商界識人無數，尋日凈係招呼人都唔得閒。
問佢有冇開心到瞓唔着？佢笑稱：「瞓得着，瞓得着！」仲希望賺半邊仔返嚟：「唔好（淨係）嫁咗個女去嘛！」咁細女Emily幾時結婚呢？佢竟然叫我哋幫手問吓。新世界主席鄭裕彤到賀之餘，仲打咗對金鈪恭賀Jack So嫁女，其他如大新集團主席王守業夫婦、嘉華集團主席呂志和、利豐主席馮國經、全國政協黃楚標夫婦及女兒Emma、行政會議召集人梁振英、成員張建東及史美倫，另外仲有包陪慶、田北辰夫婦及女兒等。
田北辰嘅女兒同Karen係青梅竹馬嘅手帕交，小學一齊讀女拔萃，英國中學又相遇，當年大家講好睇吓邊個嫁先，未嫁得嗰個就會做對方嘅伴娘，結果Karen搶先一步嫁人，不過，田家千金尋日都帶埋靚仔外籍男友現身，睇嚟都好事近啦！