立法會議員林大輝係馬主，愛駒「極奇妙」最近表現實在奇妙，就連米飯班主大輝都玩埋。事關尋日「極奇妙」出賽，大輝竟然冇落注，佢話為咗去白鴿黨黃成智嘅議辦開幕禮，搞到趕唔切落注同拉頭馬，贏少十幾萬，呢個馬主真係大頭蝦。
大輝話，尋日愛駒嗰場賽事在四時零五分開跑，佢於是決定先出席黃成智位於上水清河邨嘅議員辦事處開幕禮，然後諗住再趕到沙田馬場為愛駒撐場，點知個開幕禮超晒時，累佢遲咗入沙田馬場，佢話，如果趕到入場，點都會買番多少支持吓愛駒嘅，結果尋日愛駒跑出，淨係獨贏都派九十元，計埋大輝起碼唔見十萬元，難怪佢聲言要黃成智回水。
呢單嘢講到尾都係得啖笑，大輝再忙都可以打電話落注啫，睇怕佢叫黃成智回水係講笑，但走寶就係鐵一般嘅事實。