大笨象十六年後重回香港，好多香港人都會有悲喜交集、點滴在心頭嘅感覺，雖然大笨象揸Fit人話，亞太區係未來「五年、十年甚至下一代」嘅發展根源，解釋佢哋將行政總裁等高層搬嚟香港嘅決定，但當年逐西風時搬去倫敦，家吓追東風又返嚟香港，政府表態真係應該謹慎啲。

尋日傻強出席一個活動後被問到大笨象回歸一事，佢好開心咁話，歡迎滙控嘅決定，佢哋由倫敦搬CEO辦公室嚟香港，印證咗香港係亞太區嘅主要金融中心，可以協助唔同金融機構擴充亞太區業務。另一邊廂，任總都被問到件事，佢先話唔適宜評論個別銀行嘅決定，跟住話歡迎國際性銀行加強喺本港嘅業務，事件都證明咗本港國際金融中心嘅地位受到重視，對香港係好事。

任總講法夠晒得體

佢哋各有各講，但任總嘅講法就得體得多，最少冇貶低香港嘅地位，歡迎香港作為國際金融中心受到重視；唔係好似傻強話大笨象回歸印證咗香港係亞太區嘅主要金融中心。乜政府官員唔係好早期已經話香港係國際金融中心咩？幾時又貶咗做亞太區其中一個金融中心呢？仲要靠機構嚟印證？

其實香港做乜中心、物中心都係政府官員嘅口號，市民唔係好在乎，但傻強係政府官員，講嘢應該以香港嘅利益為重。

佢做官以來一再畀人話噏錯嘢，真係有必要好好改進吓。