小白觀點

一盅兩件冇效益

龍門大酒樓就快結業，舊式茶樓剩番都冇幾多間。不過冇辦法啦，時代唔同啦，你有冇見過西人喺龍門戙起雙腳，一邊飲普洱，一邊篤Blackberry，間唔中仲要痰上頸，咔吐一聲正中痰罐邊？可見呢啲老餅嘢完全唔合乎經濟效益，注定要慢慢被淘汰㗎啦唔係咩，開一大壺嘅茶錢，只不過係幾蚊雞，一盅兩件坐成朝早，埋單都唔夠飲杯Tall Latte。美式咖啡店就唔同，人哋啲客好似永遠唔使坐咁，買完之後唔係企晒門口寒暄幾句，就係雞咁腳返上公司開會。舊式茶樓要轉型，唔通又要整個圓形綠色Logo，特別強調選用嘅茶葉係公平交易茶葉，店員沖好普洱，仲大叫「Grande Pu-erh」咩！

網址：www.sunsiupak.blogspot.com

網友觀點......

Jenny

呢個星期都諗住去龍門飲茶，知道佢要執，都想懷舊一番。

陳記

龍門都執埋，真係冇乜舊式茶樓！飲咗幾廿年龍門茶嗰班老fans都唔知可以去邊歎咯！

道明寺

快餐店、咖啡店開到成行成市，香港特色老舖就賣少見少，政府都應諗吓點可以留住呢啲懷舊舖！

阿松

我都要去拜會吓兩條金龍至得，影相留為紀念！話晒成六十年歷史，抵影過牛下，幾有歷史價值！

阿豪觀點

「集體回憶」好短暫

見證灣仔變化嘅舊式酒樓灣仔龍門大酒樓，始終都係逃唔過倒閉嘅命運，就嚟要同大家講聲拜拜啦。想緬懷酒樓最出名嘅大包同炭燒叉燒，就要趁住酒樓十一月結業前去啦。香港人又少咗一個集體回憶，固然可惜，但諗深一層，其實香港人都幾慘，得六十年咁短暫嘅歷史，就已經搞到好珍貴咁嘞，其實莫講話龍門酒樓啦，新光戲院只有三十幾年歷史，都已經成為港人集體回憶，香港保育有幾成功，不問可知啦！

不如咁啦，大家由聽日起，買成疊報紙派畀街坊，又或者拎支結他走上街頭娛樂大眾，只要你夠恒心，堅持二、三十年，話唔定閣下都可以成為香港「集體回憶」喎！

網址：www.lukchiho.blogspot.com

網友觀點......

add我啦

香港人係咁o架啦，邊有集體回憶o架，依家報紙登咗就話會嘈兩嘈啫，過咗道氣，咪又係回復平靜！

jam紙兒

我細細個都去過龍門大酒樓，最懷念佢哋嗰啲大包，但係以後都冇得食咯！

文禮陸

十一月執o架啦，大家都仲有時間去幫襯吓緬懷一番！

吳系娥

間嘢都唔好食，變做Star嘜賣咖啡當活化，搞掂！