藍田港鐵啟田配電站尋日發生奪命工業意外，兩個工人檢查消防系統嗰陣，一個氣樽突然洩出氣體，其中一人畀撞斷咗嘅樽蓋擊中，胸部傷重不治，另一人畀碎片擊傷。港鐵話，死傷者都屬註冊消防設備承辦商嘅外判工人。工業傷亡權益會要求當局徹查真相，避免同類慘劇。

尖沙咀摩天商業大廈啱啱發生過造成六人死亡嘅工業意外慘劇，市民驚魂未定，依家又嚟多劑。唉，家陣搵食艱難，打工仔手停口停，分分鐘驚住減薪裁員，焗住頂硬上搵命博，真係聞者傷心。

叮！奪命工業意外接二連三，證明當局安全監管工作甩漏嚴重，虛有其表得個殼。工業安全響晒警號，唔該勞工及福利局局長張建宗咪再裝聾扮啞，快快趣趣做啲實事啦。

當局話喎，回歸以來建造業安全情況已有改善，業內工傷由九七年每四人開工就有一人受傷，降到舊年每十七人開工有一人受傷。可惜，吹水係冇用嘅，擺喺大家眼前嘅事實係，久唔久就有一單悲劇，久唔久就有工人罹難，久唔久就有家庭失去經濟支柱，唔通咁都值得自吹自擂？

好似尖沙咀嗰單慘劇咁，意外喺禮拜日發生，有工會指假日通常冇地盤安全主任值班。再講喇，就算有地盤安全主任值班，亦唔表示唔會出事。地盤安全主任入職要求偏低，中五畢業讀完相關課程，有兩年工作經驗就可以申請，當中可能存在嘅安全隱患，有關部門知唔知？如果知又有冇監管？呢啲問題，當局仲欠市民一個交代。

咁啱得咁蹺，同尖沙咀奪命意外一樣，尋日嘅意外同樣涉及外判工人。事實上，近年工業意外受害者唔少都係外判工人，有啲仲係判上判。工程外判愈嚟愈普遍，但有關部門並冇因此而加強監管，更弊嘅係，政府其身不正，自己不斷將工作外判之餘，連監管責任都外判埋。

呢嗱，屋宇署、機電工程署同懲教署等多個部門，近排相繼爆出外判合約員工續約嗰陣畀承辦商大幅削減薪酬嘅消息，而且減幅閒閒地一成幾，引起工會強烈反彈，呢啲咪係監管不力嘅後果囉。

叮！港府連自己嘅外判工作都冇監冇管，搞到一鑊泡，旨意佢監管涉及外判承辦商嘅工業安全，根本就係嘥氣。仲有，依家涉及工業意外死亡個案嘅違例僱主平均只被罰款萬幾蚊，點會有阻嚇力吖。該監管嘅唔監管，該修例嘅唔修例，都唔知班官老爺坐喺冷氣房入面做咗啲乜。

工業意外一而再、再而三發生，如果當局繼續懶懶閒，唔監唔管，以後可能仲死得人多。「一宗都嫌多」？咪再吹水啦，叮！