行政會議召集人梁振英（CY）近排好高調，前晚佢一手湊大嘅專業聯盟舉行十．一晚宴，多名高官都有畀面撐場，晚宴仲有卡拉OK娛賓添，CY席間高唱一曲。佢係疑似特首候選人，當晚咁多高官畀面撐場，唔通有弦外之音？
當晚到賀嘅高官包括發展局局長林鄭月娥及常秘周達明、運輸及房屋局局長鄭汝樺、環境局局長邱騰華、審計署署長鄧國斌等，周一鑊同副局長梁卓偉都孖必到場。
CY當晚好陶醉，同晚宴籌委會主席、醫學會副會長周伯展醫生上台獻唱一曲，將晚宴推向高潮，CY仲訂造一個大蛋糕，寫上「專業發展，共創和諧，繁榮昌盛，國泰民安」十六字，十足醒獅旁白，話表達香港專業界嘅心聲。不過，口痕友話當晚咁多高官捧場，唔通有意買定保險？