26/09/2009

播放本新聞相關短片

政情:阿婆莊主替邱誠武改名

廣深港高鐵搞出大頭佛,要收地拆村嘅石崗菜園村抗爭行動無日無之,運輸及房屋局副局長邱誠武係拆彈人之一,過去一段時間,佢都親身落過村,尋日年逾七十六歲高齡嘅莊主霞姐陳錦霞致電電台爆料,講出「邱誠武微服落村記」,兩個人見面時仲妙問妙答添。據講,官場暱稱邱武嘅邱副局離開條村時並冇攞到滿手菜,但就獲霞姐賜花名「阿有」。從佢哋交手過程嚟睇,菜園村真係唔易擺平㗎!

據霞姐話,邱武係喺今年五月左近去佢屋企,當時佢借探訪教友為名,微服出巡去探聽遷拆戶嘅訴求,期間邱誠武一輪嘴問咗霞姐好多問題,好似佢有乜遷拆嘅訴求?接唔接受畀多啲賠償?你知唔知菜園村啲人有乜訴求……霞姐話農莊係佢第二生命,點都唔走,又話唔可以代菜園村居民答問題,即係冇得傾!霞姐仲一口咬定,邱武當日由頭到尾無表明副局身份,莫非暗示邱副局有心陰佢?

最好笑嘅係,邱武向佢自我介紹全名時,霞姐話好難記噃,邱武跟住話你叫我「阿武」啦,點知霞姐話:「吓,阿冇?冇冇聲唔好聽,不如叫阿有啦!」就係咁,邱武多咗個花名,霞姐講起前事笑到好開心,睇怕佢哋好快有下一次交手。