暑假之後，名人圈聚頭都會交流呢個暑假去咗邊，好似日前喺酒會上，幾個政務官出身嘅女常秘就雞啄唔斷，一直交流暑假外遊嘅經驗。講緊嘅係財經事務及庫務局常秘「頭箍小姐」區璟智同商務及經濟發展局常秘蔡瑩璧。
事關區璟智同蔡瑩璧八至九月都有攞假歎世界，咁啱得咁蹺，兩個人前後腳去咗意大利地中海沿岸嘅Cinque Terre（五漁村）自駕遊，五漁村小鎮係以一層層依臨海山崖而建嘅彩色房屋而聞名，已被列入世界文化遺產，兩個人一講起當地嘅景色，都大讚靚到不得了，見到好多梯田、葡萄園及橄欖樹，但缺點係山路彎位太多，開車要格外留神。
咁意大利之行掃咗乜嘢貨呢？蔡瑩璧話買咗四支紅酒返屋企慢慢歎，至於區璟智就坦承其中一個戰利品係頭箍，乜嘢牌子就唔肯講，總之係佢心愛嘅款式啦！