賭王轉院等時機

原本前日轉往養和醫院嘅賭王，有指因病情反覆，結果聽從主診醫生意見，暫時將轉院時間押後。據知，二房一直主張賭王轉院，希望為賭王換上更舒適環境，安心養病，但最終考慮到賭王要喺最穩定情況下轉院，急都急唔嚟，一切有待醫生嘅指示。

由於之前為轉院做準備時搬走唔少物品，依家轉院押後，前晚九點幾何超瓊通宵陪伴賭王，亦要自備枕頭被鋪。點知佢尋日朝早十點離開時，發現有很多車輛堵塞門外，搞到座駕未能駛至側門，佢忍唔住向保安黑晒面，仲對記者講：「我冇嘢講，唔該！」逕自上車離開。直至黃昏佢再到醫院，被問及賭王係咪短期內轉院，佢反問：「吓！你哋仲坐喺度？」連日來不願提及賭王轉院嘅三太，尋日晏晝終於回應轉院一事，問到係咪因病情反覆要押後，三太話：「唔係反覆，（咁係咩？）係……」即時被友人拉走。

晚上三太再到醫院時，再被問到賭王幾時轉院，三太就回應：「未決定，仲諗緊，（因為養和醫院設備好啲？）又唔可以咁講，主要嗰邊地方大啲，（中秋後會否有決定？）其實仲係未定到。」