淫警公然喺警署非禮及強姦女報案人一案，令到市民對警署好有戒心，連公務員事務局局長俞宗怡（D姐）日前在一個酒會上當面訓斥警隊高層，話旺角警署發生嘅淫警強姦報案人事件令警隊蒙羞，保安局局長李少光尋日都好感觸，直嘆：「唉！樹大有枯枝，淫警事件好負面，一定唔可以再次發生！」
D姐作為公務員之首，對事件嘅評語可以話係警隊嘅羞恥，光哥呢句「樹大有枯枝」雖然唔算尖銳，但就可以睇到佢作為部門阿頭嘅心酸。其實光哥都算講得客氣，呢件事點只枯枝咁簡單，直頭震碎晒市民對警隊、警署嘅信心，最慘係個淫警最多都係坐十二年，但受害人可能困擾一世，而警隊更唔知要用幾耐時間先可以恢復市民對佢哋嘅信心。