「十一」臨近，香港政圈、名人圈都忙住北上，政府尋日刊憲，除咗煲呔曾同兩個司長外，十二個政策局長有過半攞假，即係話，港府領導層有一個星期幾乎陷入真空狀態，但願唔好爆大鑊。
今次香港有份上京嘅主要有人大、政協系統，同埋特區政府出面邀請嘅觀禮團兩路人馬，人大、政協住北京飯店，貴賓樓安排畀外國政要，特區團就要住到較偏遠嘅港澳中心。
而能夠上天安門城樓閱兵嘅據講只有二十幾人，包括全國人大常委范徐麗泰、十六名全國政協常委、特區特首、司長，同埋城中幾個超級富豪，其他人就要喺廣場觀賞。閱兵喺十一早上九點開始，為時兩粒半鐘，參觀者要提早喺七點出發，散場又預半粒鐘至走到，即係焗住企定定五粒鐘。