26/09/2009

播放本新聞相關短片

政情:新聞處烏龍吳斌空歡喜

本文重點
啱啱獲行政會議通過保留政府部門身份嘅香港電台,尋日喺網上報咗一則標題為《吳斌續任個人資料私隱諮詢委員會主席 任期2年》嘅新聞,由於呢個委員會嘅主席正正就係個人資料私隱專員,有關報道令人以為吳斌獲政府續任做多私隱專員兩年,點知呢個報道見光唔夠幾個鐘,就畀新聞處打倒,當事人吳斌嘅心情睇怕都會好似「笨豬跳」咁,一陣好High、一陣好Down。

港台跟住錯

資料顯示,政府係○五年委任吳斌嘅,任期五年,明年八月底就約滿,點解今次無端端突然會獲提早續任兩年呢?尋日憲報刊登嘅政府公告顯示,真正獲政府委任同續任兩年嘅係委員會其餘八名成員,而唔係身為當然主席嘅吳斌。

港台出錯,政府新聞處都要負番多少責任。事關新聞處嘅中文版新聞稿,將「委員會的成員」包括主席吳斌同另外八人嘅任期講為兩年,不過,英文版卻顯示,今次錯誤源自新聞處將英文嘅「membership」同「members」,一律翻譯咗作「成員」所致,證明部分港府官員嘅中文都仲係差過英文。

我哋問過新聞處同政制及內地事務處嘅回應,冇人認自己有錯,仲話啲稿件冇問題,點知夜晚新聞處都要死死氣出稿澄清,仲喺任期兩年嘅名單中刪咗吳斌個名,即係改錯但唔認錯。

講番續約問題,吳斌成日同政府唱反調,包括高調介入多個政府及公營機構接連洩漏市民私隱事件、篤爆校本驗毒計劃可能侵犯私隱,以及公開批評政府唔畀公署擴權等,令唔少高官對佢有微言,好多人都估佢會喺明年八月約滿後冇得留低,今次畀人舞上舞落,真係玩謝咯!