赤鱲角機場係香港嘅大門口，不過，連接機場同青馬大橋嘅北大嶼山公路，兩邊居然以枯木迎接旅客。樹木唔止稀稀疏疏，仲好似斷橛禾蟲咁，呢度一啲，嗰度一啲，真係睇到都羞家。

全世界嘅機場公路幾乎都係兩邊種晒樹o架啦，除非機場起喺沙漠中間啫，因乜解究身處亞熱帶嘅香港，機場公路變咗「沙漠公路」嘅？原來係政府規劃失當。

康文署○一年斥資一千萬，計劃沿北大嶼山公路種十萬五千棵開花植物，包括洋紫荊、象牙花、鳳凰木等，聽落真係「百花爭艷」。可惜八年過去，公路兩邊依然好似光禿禿嘅和尚頭。根據土木工程署嘅文件，依家沿路只剩低幾千棵樹。

康文署綠化搞到神神化化，原來佢哋根本就冇規劃好，起條路嗰陣冇預留種樹嘅土地，又缺乏種樹嘅連續空間。就算種得樹嘅地方，唔單止泥土深度唔夠，連灌溉系統都缺乏。

叮！政府部門閉門造車就聽得多嘞，康文署居然發明「無土種樹」添。呢頭話綠化，嗰頭連植物生長最需要嘅空間、泥土同水都冇規劃好，仲綠乜鬼化吖。唔通將啲樹種喺石屎上面咩，康文署到底想種樹定係毀樹o架？

點收科？呢鋪杰咯。土木工程署計劃展開「補鑊」工程，包括加種植物、增加綠化斜坡覆蓋率、更換種植土壤、改善灌溉系統，計計埋埋要使多七千萬。原本一千萬嘅工程，居然要使八千萬至埋到尾，仲要明年五月至開工，需時約三十個月，納稅人真係畀康文署搵晒笨。

講開康文署規劃不當亂掟公帑，真係衰嘢多籮籮。呢嗱，近年愈來愈興欄杆花盆，通街都係。康文署喺灣仔區唔同街角設置圓形大花盆，種上時花，但係時花擺唔到幾個禮拜就枯晒，再種一次就要幾萬蚊，單係搞掂呢啲花盆，一年要使過百萬。至弊嘅係，呢啲花盆好多已經變咗缺德人士嘅煙灰缸同垃圾桶。

叮！美化環境變咗影響市容。查實，康文署無論種植定係保育樹木，一向都求其是但。好似港島赤柱刺桐古樹倒冧砸死十九歲女仔咁，康文署樹木保養組唔單止資歷唔夠，對檢測儀器嘅使用亦矇查查，未能準確偵測古樹內部腐爛情況，更冇採取相應預防措施，結果釀成本來可以避免嘅慘劇。

叮佢個鎯鎯！當局呢次再斥巨資重新綠化北大嶼山公路，話要改善旅客對香港嘅第一印象喎。至弊康文署班「假保育」做親嘢都拾吓拾吓，冇泥都話可以種樹，睇怕呢七千萬都係留番一半，第日攞嚟執手尾穩陣啲咯！