小白觀點：o靚模眼中的港女

港女喺建材連鎖店狂插店長，仲拍埋片上網添，「港女」呢個有地道香港特色嘅名堂，又成為全城熱話。咁到底乜嘢叫港女呢？

互聯網上一早有非常詳細嘅研究，不過呢啲「港女學」 好多都係出自電車男，或者會帶有偏見，為求公道，小弟特登喺書展買咗本模寫真，引經據典睇吓模眼中乜嘢叫港女。「我想大部分人眼中的港女都比較負面，不過我自己就覺得港女係比較鍾意發脾氣，喜歡自拍，有所謂的公主病，對男仔要求比較高，追求名牌。」真係真知灼見呀，只不過佢最後要加多句「其實當中好多都唔係咩缺點嚟嘅」，打死都唔認係港女，呢個至係問題！

網友觀點...X）...

[　Jack　]

真係好憎港女，見到都彈開，以為自己好叻，有佢講冇人講，永遠都覺得自己就係道理睇唔起人，聲討港女！

[　匿　名　]

睇住啲港女話番港女，呢個情景仲得意呀！

[　超　仔　]

網友聲討呢啲港女就啱喇，咪等佢哋以為自己好巴閉，行為野蠻仲想人哋鼓掌，咪天真啦！

[　港　女　]

港女滿香江，大家妒忌我哋有智慧有條件之嘛，永遠打不倒，港女必勝yeah！

網址：www.sunsiupak.blogspot.com

阿豪觀點：港女短片信心保證

港女大鬧建材店，相信大家都睇咗片，毋須豪伯在此多講啦。呢件事反映大家已習慣咗用「港女」一詞，一見段片同港女有關，即刻知有熱鬧睇，難怪喺網上熱爆。

事實上，港女可以話係繼「醜陋的中國人」之後另一個偉大發明──中國人梗唔係個個「髒亂吵」同「窩裏鬥」啦，正如香港女仔唔係個個都崇尚名牌、鍾意發小姐脾氣。至於點解港女同醜陋的中國人一樣叫到開巷而冇乜人反對，女士們自己都要檢討吓喇。

不過港女們都未必冇得救嘅，起碼中國人喺外國守秩序，畀人以為係日本人大家聽得多，但就好似未聽過香港女仔斯文大方而被人誤認係日本妹囉！

網友觀點...X）...

[　卜　勤　]

印證一句話：社會自有公論，網上自會公幹！

[　sophia man　]

我係港女都睇唔過眼，呢啲人真係影衰晒我哋！

[　我係淑女　]

唔該咪港女前港女後呀吓，我都係香港女仔，但係唔會好似嗰條女咁唔講道理囉，你班臭男人再嘈，我即刻鬧爆你哋！

[　曹格鬥　]

畀我係嗰個建材連鎖店經理，會立即曹格上身，一招穿心腿侍候佢！

網址：www.lukchiho.blogspot.com