大珠三角商務委員會尋日出咗份報告，建議加強粵港合作，但兩地仲有好多嘢需要打通至得。
委員之一嘅行政會議成員鄭耀棠喺內地有個竇，先知祖國嘅銀行服務有幾「好」。佢話發現內地啲銀行係唔可以互通嘅，轉帳更加做唔到，就算間銀行喺呢個禮拜話做到，下個禮拜都做唔到，所以喺呢方面嘅服務真係慢到暈。咁就真係要打通先得喇！
講到國家發展及改革委員會發表嘅《珠三角地區改革規劃綱要》，棠哥煞有介事咁話咪當等閒，事關呢份綱要係阿爺搞出嚟嘅，只係授權畀廣東搞啫，所以香港係有角色嘅，唔可以懶懶閒之外，亦唔可以做得慢，佢臨尾仲話：「香港要醒啲嚟。」煲呔曾同唐唐收到未？