唔少港商同內地做生意，都應該領教過內地人嘅「隊酒」文化，真係唔講得笑o架！尋日喺一個飯局見到有「棉花公主」之稱嘅行政會議成員楊敏德，佢喺三十年前開始喺內地搞紡織業，仲愈搞愈大，佢話喺內地飲酒傾生意，心口要掛住個「勇」字，就算唔飲得都要死頂，所以爸爸曾經讚佢「酒量五流」，但「酒膽一流」，而佢就一直將呢句說話銘記於心。
棉花公主又講到以前喺內地做生意困難重重，但佢冇提及自己嘅辛酸史，反而話記得有次見到美心太子女、全國政協常委伍淑清哭訴牛肉無法出口去內地，等到批牛肉唔用得都未批得到，之後搞咗好耐先放行，總之限制多多啦，相反香港因為經濟自由開放先至做到咁成功。不過，無論去邊度做生意都好，棉花公主話做生意一定要抱住「Can do」精神先能夠成功喎！
其實，伍淑清都曾經講過三十年前去內地洽談飛機餐生意，試過畀對方以「門前清」方式「隊酒」，即係茅台、白蘭地同啤酒樣樣飲齊晒先至有得傾，即使依家練出酒筲箕，但飲之前都食定幾舊牛油墊住個胃，無謂咁傷身嘛！