賭王何鴻燊原定尋日清晨轉到養和醫院繼續接受治療，但凌晨突然傳出取消轉院嘅消息，而賭王嘅家人亦漏夜帶嚟疑似X光報告再現港安醫院。據悉，正留院嘅賭王病情反覆，於是聽從醫生意見暫時唔轉院。
賭王轉院嘅消息傳出後，除較早時何家工人將大量物品由港安醫院搬走外，尋日凌晨十二點幾已有多架私家車泊喺醫院附近，準備護送賭王轉院。及至凌晨一點幾，突然傳出賭王取消轉院嘅消息，未幾，佢二房女兒超鳳、超遐手持疑似X光報告入醫院，通宵逗留。
尋日賭王幾房人如常去醫院探病，但佢哋都對轉院一事封口。三太陳婉珍喺上晝十一點到達，被問到賭王係唔係轉院時，佢即搖頭話：「唔係呀，邊個講㗎？」說罷隨即匆匆上車。而四太梁安琪則喺下晝五點現身醫院，但冇同記者講嘢就直接上病房探望賭王。