政治化妝師嘅基本條件係乜？最重要係有政治手腕、識得點同政治團體溝通、幫政府sell政策，仲要同外界有更多嘅接觸，講得白啲即係要好talk得同social，但偏偏環境局副局長潘潔就唔多鍾意講嘢，仲唔多習慣social添！

話說潘潔尋日為一個幼兒環保教育活動主禮，上台致辭唔夠五分鐘，一時講全球氣候暖化，一時又話十年、二十年後小朋友要面對挑戰。講埋呢啲嘢，嚟撐場嘅嘉賓當然覺得係小兒科啦，但班幼兒園幼稚園學生似乎唔多聽得明，成班細路「O晒嘴」。喺呢五分鐘演辭入面，潘潔不忘邀功，吹噓佢個局力推嘅膠袋稅喺七月推出以嚟做得好成功。

點知佢落咗台冇耐就起身走人，前後夾埋喺現場逗留咗半粒鐘，連小朋友嘅手仔都未拖過。問佢點解咁快走，今次輪到潘潔O嘴，佢點一點頭，個樣好尷尬，閃都閃唔切！

人肉錄音機認知度極低

睇番佢過往出席嘅活動，大多數都係探訪吓啲婆婆同小朋友，根本冇乜殺傷力嘅，而呢次仲係幼兒添，使乜咁驚呀？竟然連同啲學生親近吓嘅social嘢都唔做。

老實講，潘潔喺立法會議事廳成日畀班議員鬧，就因為佢好似人肉錄音機咁，有次仲激到班議員發爛渣，鬧佢「十問九不知」，好難溝通；再加上佢嘅認知度極低，喺班副局長當中，佢嘅排名係尾三。

本來唔talk得已經係斷咗一瓣，但連政治手腕、溝通同social都唔掂，做政治化妝師竟然唔識得化妝，咁仲做得啲乜？