該名夜更的士司機姓陳，人稱「阿揚」。他為免麻煩拒現身，但昨在電話向本報記者講述遭遇時，仍驚到口震。阿揚稱前日凌晨一時許，有四名男子在中環蘭桂坊斜路截車，其中三人坐在後座，一人坐在司機位旁，示意去北角油街。當時他聞到乘客身上有酒氣，開車不久便覺得「唔對路」，其中兩人開始口角，愈吵愈大聲，更開始「郁手郁腳」。

他激動地說：「我咩都唔知，點知佢哋係乜嘢人呀！邊個打邊個到今日我都仲未分到！」（佢哋嗌啲乜？）「點知佢哋嗌乜呀，又中文又英文，都唔知講乜！我又要顧住架車，又唔知佢哋係乜嘢人，佢哋個樣好似講緊數咁！」（有沒有爆粗？）「梗係有啦，我當時幾驚呀！淨係諗住拿拿聲做完單生意。」

地盤工：分分鐘累死我哋

阿揚指的士駛至金鐘時，「有人係咁用腳撐我個車門」，他於是急煞車，然後「金毛」跳落車隨即折返，起腳伸向車內另一人，傳出慘叫聲，阿揚當時已嚇得不知如何是好。他稱：「個金毛跳咗落車擸架生，好似要開拖，我真係好驚，最驚佢打爛我架車！」

另外，事發現場修路地盤的一名工人（見圖）昨晚表示，他初時不知有人打架，只知路牌被人掉在馬路中心好危險。另一名工人則埋怨曹格：「佢咁做分分鐘累死我哋，地盤有乜事，我哋要孭鑊㗎。」