【本報訊】曹格與側田兩名老友反目毆鬥，究竟為何「扯火」？曹側兩人昨日分別講述導火線，雖點到即止，但說法基本一致，均指在Jam歌時，曹格認為側田被人「蝦」，欲替側田出頭，兩人因誤會起衝突。但有當時在場人士透露，側田心情不佳，借酒意發脾氣稱想退出娛樂圈，正在打鼓的曹格Off Beat，被側田怪責，因此起衝突。實情如何，仍有待兩人交代。
側田昨晨接受電台節目主持人查小欣訪問時說：「曹格誤會我被我自己嘅朋友『蝦』，用兄弟身份撐我，所以出聲幫我，但我當時幫番自己個朋友解釋，最後導致我跟曹格嘈起交上嚟。」
另一主角曹格昨晚接受電視台訪問時則稱，事前側田先到他下榻的酒店，其後一起到酒吧消遣。期間他發現有人對側田不尊重，「我見朋友受到欺負令我好忟，自己畀人蝦都無咁嬲。但當時側田話冇事，我同佢講咁好玩咩，人哋笑你，你咁都忍得。之後我就Lost（迷失）咗。」因而觸發了打鬥事件。
不過，一位當時在場的人士透露：「側田同曹格成日都去嗰間私人Studio Jam歌㗎，而側田最近自覺『金牌大風』對佢唔好，覺得公司好混亂，已經好唔開心。嗰晚佢又因為飲大咗，一度喺現場發脾氣話『唔做娛樂圈啦！』咁啱佢聽到同場Jam歌嘅曹格，打鼓打到Off Beat，側田借題發揮，衝上台指曹格打鼓「打成咁㗎……」繼而引發衝突。
不過，該名人士稱：「佢兩人成日都有拗撬，但又係好朋友，今次打完後，曹格飛咗去北京做嘢，但知道事態嚴重，所以特別飛返嚟香港解畫，亦係重兄弟情嘅表現。」