不過，廟街依家認真不妙咯，金融海嘯同豬流感打孖嚟，商戶個個雞毛鴨血，冇啖好食，生意一下唔見咗六成。至弊政府部門好似「廟街歌王」唱嘅咁，「齊齊喺個山窿度詐眼瞓」，翹埋對手睇住廟街衰落去。

商戶冇計，惟有自救。依家內地個人遊啲客唔再幫襯，連東南亞遊客都唔多見，歐美遊客係最大客源。油尖旺區議會最近撥款三百幾萬，準備喺廟街南北兩個入口各建一座中式牌樓，希望呢啲地標式建築物可以吸引歐美遊客，將廟街發展成全球首屈一指嘅夜市。

叮！廟街係最具本土特色嘅旅遊景點，政府施援手唔係純粹幫商戶咁簡單，而係幫緊成個旅遊業，幫緊香港，提供協助，責無旁貸。生意暴跌，商戶連皮費都蝕埋，開飯都成問題，呢個時候政府仲關人個關，唔通想睇住廟街死？

班官員人工從來都嫌少，做嘢從來都嫌多，大條道理「唔會干預市場」，乜都唔使做。呢嗱，遠嘅唔講，呢次金融海嘯殺到埋身，個個身家大縮水，打工仔唔係畀老細炒魷就係要減人工，個個撳住荷包過日子，商舖拍晒烏蠅。

零售同飲食業界一早就要求政府倣效台灣同內地部分城市，向市民派消費券，但政府一於詐傻扮懵，聽唔到，睇唔到。業界迫於無奈惟有自救，先係飲食業聯手派優惠券，跟手零售業因應特定主題免費派消費優惠券，刺激市民消費意欲。如果等政府打救，商戶未見「曙光」，早已經執清光啦。

叮！政府無能令商戶經營困難，唔單止廟街不妙，仲搞到旺角唔旺添。接連發生鏹水彈「空襲」，人人自危，行親入旺角都頭岳岳，商戶就個個眼光光，生意想好都難啦。

吓，當局淨係識守株待兔，喺附近大廈裝咗「天眼」之後翹埋雙手等鏹水彈狂徒再現身。商戶被慢慢陰乾，焗住諗計自保，佢哋前排收集咗十幾萬捐款，決定幫行人專用區內二十幾幢舊樓裝鐵閘同天台門，堵塞大廈「無掩雞籠」保安漏洞，減低狂徒再犯案機會。

政府講就「以民為本」，做就以民為笨。廟街商戶依家吊緊鹽水，商務及經濟發展局局長劉吳惠蘭咪又話唔關政府事呀。如果鋪鋪睬你都嘥氣，局長仲要嚟做乜？叮！