上任唔夠半年嘅香港律師會會長王桂壎搞作多多，搞籌款、搞廚藝比賽，上禮拜喺律師會嘅大型晚宴，佢仲上台夾band，對住成千觀眾邊彈邊唱。原來佢都係粵劇發燒友，尋日仲去咗信和管業優勢同八和會館合辦嘅粵劇習賞獎勵計劃嘅發布會，講起先知佢細細個已拍住粵劇名伶阮兆輝做戲，但只係做佢身後嘅小書僮。
王會長話幼時家住鑽石山大磡村，附近冇乜嘢玩，但出名嘅大觀片場同堅城片場都係喺附近。唔通因為近水樓台，畀星探睇中入行做童星？非也！因為家窮，佢細細個就諗住幫輕吓父母，於是同埋班同學仔喺片場附近徘徊，博入去做兼職茄喱啡。
佢話當時做嘅都係喺童星後面行行企企嘅角色，即係路人甲啦，一日可以賺到五粒臣（五毫子），如果個角色有對白，仲會多五粒臣添！一個禮拜通常會有兩三次演出機會，計落都算幾好喇！
可能係近朱者赤，令佢醉心粵劇，幾忙都會抽時間睇劇過吓戲癮，仲最鍾意扮薛覺先嘅獨特唱腔添！咁幾時有機會睇到佢唱戲呢？佢就好怕醜咁話只會同太太喺屋企自己唱，唔敢出嚟唱喎！