但孫公尋日仍抽空去咗一個由直接資助學校議會同教育局合辦嘅中學生歌舞表演節目，特別表演嘉賓香港中樂團有場打鼓表演，近十個團員一人一個大鼓，但作為主人家的孫公竟然同場加演一場「孫公見周公」，事關喺擂鼓聲中，佢竟然喺台下有理冇理瞓着咗，遠睇仲以為陶醉喺鼓樂之中添，連坐喺旁邊嘅一眾匯演籌委會校長都唔敢擾人清夢。睇嚟孫公真係好攰喎！

在場嘅攝記見狀立即舉起相機，鎂光燈閃呀閃，閃到瞓咗兩次，每次三、四分鐘嘅孫公都醒番，「好夢難圓」嘅佢知道畀人影相後，就即刻坐番直，唔敢再瞓嘞！

其實個表演長達三個半鐘，孫公睇咗一半先走都算係咁，加上香港華仁書院管樂團都有份表演，作為華仁舊生嘅孫公，專登睇埋師弟表演至鬆人，畀足面啦！