24/09/2009

播放本新聞相關短片

政情:D姐戥警隊蒙羞

自從發生淫警梁禮仲公然喺旺角警署內強姦報案人事件後,市民對警察失晒信心,令近年醜聞不絕嘅警隊雪上加霜,形象插水。原本以為事件喺犯案警員被判監後會漸漸淡化,但尋日喺一個酒會開始前,見到公務員事務局局長「D姐」俞宗怡同幾個警隊高層密斟,當中包括警務處副處長曾偉雄,佢哋傾傾吓,D姐忽然略為大聲咁講咗句:「執法人員喺執法地方,仲要係對報案人,我真係戥你哋蒙羞!」

曾偉雄聽到D姐咁講,即時一邊點頭,一邊回應,但佢講咗乜,我哋就聽唔到嘞,亦唔知雙方對話嘅前文後理,但單憑D姐嗰句話,都可以推敲到佢哋講緊邊單案啦。

香港警務督察協會主席廖潔明早前要求公務員事務局落實紀律部隊職系架構檢討時,同D姐撐到行,但講開淫警一案,佢即時同D姐同聲同氣,佢話:「我同意佢咁講,呢件事係警隊百幾年嚟最羞恥嘅一件事,佢形容得好恰當,任何人都可以咁描述!」廖Sir又話警隊冇因為呢件事而士氣低落,各人反而更加努力工作,務求同淫警劃清界線。