本報日前獨家披露賭王日內將轉去養和醫院，有指今日會正式轉院，所以尋日引嚟大批傳媒喺醫院守候。由於何家唔想引起混亂擾及賭王，所以一向合作嘅何超盈尋晚離開醫院時，亦一反常態走側門，冇接受傳媒訪問。晚上約九點，何猷龍離開，被問到賭王情況時，佢只係話：「幾好。（係咪出院？）未知。（可唔可以返屋企過中秋？）未知。」但未幾卻見到賭王嘅十幾名保安同工人，分批將大量物件搬上七人車，相信係為轉院做準備。

據知賭王家人早喺上個禮拜已訂咗養和醫院一間位於新翼嘅私家病房，而病房嘅設計同面積可媲美酒店總統套房，除病人入住嘅房間外，仲有客、飯廳、洗手間，同一間陪客房，每日收費最少三萬蚊。賭王雖然可搬離ICU，但據知佢嘅病情依然反覆，轉換較大同較舒適嘅環境，可以等佢更安心養病。