信和置業主席黃志祥個仔黃永光漸趨高調，除為旗下灣仔喜帖街同大澳舊警署重建項目頻頻曝光外，最近又有新任務。尋晚跑馬地夜賽，黃永光入場為愛駒「永利多」打氣，結果愛駒不負所望，以熱門姿態勝出。佢話好開心，仲透露會幫競駿會做義工「拉客」。
黃永光話馬會希望佢幫手介紹認識嘅朋友接觸吓跑馬運動，一班好友分享賽馬心得外，如果贏到獎金又開心，但輸咗都冇所謂，可以當做善事喎。黃永光被視為信置嘅接班人，認識嘅朋友肯定非富則貴，相信可以幫馬會發掘到好多賽馬愛好者。
近期樓宇交投暢旺，問佢依家係咪置業好時機，佢就笑一笑，然後打開的士車門，邊上車邊話：「我都好支持環保o架！」然後迅速離去。唔通佢想暗示信置啲樓好注重環保？