至於外號「五散人」嘅五名獨立功能組別議員，亦因為冇被政府歸類為政團而不獲安排獨立會面，令其中四人決定杯葛今次諮詢。最初仲以為煲呔曾會好似對待富貴黨咁，事後私下約佢哋飲茶補數，但五散人之一嘅廠商會林大輝尋日就話，佢哋連茶都冇啖飲吓，質疑煲呔曾根本冇將五散人放在眼內。

大輝話眾所周知佢哋五個其實已經行得好埋，如果用結婚嚟比喻，佢哋雖然未有正式註冊，但已算係「事實婚姻」，可惜煲呔曾太過執着於形相，先至拒絕承認佢哋嘅關係。佢批評煲呔曾開口埋口話會加強同議員溝通，依家卻自斷溝通之路，仲話：「如果真係有心，朝早五點食早餐時可以見，凌晨食消夜都可以見，又點會抽唔到時間呢？」仲使講到明咩！五散人成日搞到政府估佢哋唔到，政府都唔知佢哋係咪自己友，煲呔曾閂埋門要招呼同安撫嘅當然係自己友啦，即係 member only 囉！

梁家騮作反單飛

大輝仲透露佢哋將喺下月立會復會前再聚首，商討點樣進一步加強合作。問到會唔會因應今次事件而正式「註冊」，組成一個有名又有實嘅政團，佢就話唔會做啲捨本逐末嘅嘢。

但保險界嘅陳健波早前就用「拍散拖」嚟形容五人嘅關係，雖然都冇「一夜情」咁疏離，但仍然同大輝所講嘅親密關係差咗一個層次。醫學界嘅梁家騮更加懶理其餘四人嘅杯葛行動，自己走咗去同其他獨立議員一齊見煲呔曾，事後又對五散人加強合作大潑冷水。睇嚟煲呔曾唔肯承認呢段「事實婚姻」，五散人自己都要負啲責任。