24/09/2009

播放本新聞相關短片

博客擂台:無車日做騷日

一個全新的報上部落格,每日與你暢談社會至Hit話題,剖析問題所在

小白觀點:掃清心戰室壞鬼師爺

日前有環保組織搞咗個無車日,成班高官笑口噬噬坐巴士、搭地鐵一日咁大把,民望當堂大升。原來無心插柳做場無車騷,效果竟好過清潔騷幾百倍,睇怕煲呔曾今次真係要幫佢個心戰室搞個「全室清潔大行動」,掃晒啲壞鬼師爺出嚟咯。

不過班高官做完騷後,咪又係坐番架幾千cc嘅靚車周圍去!坐車唔緊要,但一定要堅持久唔久換新車。你知啦,呢班高官年紀唔細,有啲翻閹又翻閹,如果架車好似白車咁跪低,佢哋可能要喺街頭、喺大庭廣眾面前上演一場鬧市推車,隨時畀外國傳媒影咗張相,仲用有地道洋涇浜特色嘅英文起題:「Old Man Push Car」,咁就失禮死人囉。

網址:www.sunsiupak.blogspot.com

網友觀點......

小新

班官做晒Show就話響應無車日,咁全香港9成8打工仔咪環保中堅分子?激死!

穎塋

見佢哋個個懶係身水身汗咁嘅款,咪以為佢哋真係行到隻積咁,分分鐘係喺上鏡前灑水淋身。

kate

得嗰一陣做Show搭公車行路,咁就叫環保,唔做好過啦,假到死。

龍哥

叫班官賣晒啲車,日日行返工,睇吓佢哋又咩樣吖,一定走夾唔抖,以後香港冇得再搞無車日。

阿豪觀點:三百六十四日都係有車日

啱啱過咗國際無車日,高官們就算幾心不甘情不願都好,都要出嚟做吓騷搭巴士又或者行路返工。至於有冇用,外界就似乎唔係太樂觀嘞。好簡單,只係唔坐私家車一日咁大把,一年裏面嘅其他日子,咪又係大放特放溫室氣體!

之前咪話啲高官一個二個鍾意用幾千cc嘅大馬力座駕,畀環保團體插到飛起嘅,喺呢度我都要為班高官講番句公道話,講真啲車外形又真係幾靚,如果豪伯我有錢都會買番架。大家有冇睇電影《波叔出城》呀?波叔喺哈薩克故鄉架私家車都係相當豪華㗎,不過係用隻驢嚟拉咁解,只要特區高官學習波叔精神,咁就算日日係有車日都環保到極啦!

網址:www.lukchiho.blogspot.com

網友觀點......

懶人

冇幫助,因為其餘嗰三百六十四日都係用大馬力「環保」車,啲廢氣一樣喺度。

黎安

特首一個帶兩個新聞官、兩個保鏢、幾十個記者,全部人晨早揸車搭的士去接特首……嘥……氣。

working class hero

窮人一年三百六十五日都搭公共交通工具,夠晒環保啦,有冇人褒獎吓呀又?

Ali G

高官做騷從來都係有姿勢冇實際啦,如果做騷有用嘅話,咁全城清潔日之後香港咪一塵不染?

發表方法

讀者如對本欄每日話題有任何意見,歡迎登入網址發表意見。本報保留採用刊登權利,不另通知,敬請留意。