世界衞生組織尋日喺香港做大戲，舉行一連五日嘅區域會議，會上世衞總幹事陳馮富珍認為，十月係流感高峰期，豬流感嘅第二波已開始，本港及英美等地嘅豬流感個案有上升趨勢。

不過大家唔使恐慌，陳太幫豬流感大打退堂鼓，話現時嘅病毒同四月爆發時嘅情況相似，暫時睇唔到有變種嘅情況出現，相信疫苗有效對症下藥。佢認為香港口岸檢疫措施可以視乎情況逐步放寬，將資源投放喺治療病人。

冇錯，根據各種科學數據顯示，豬流感病毒嘅殺傷力冇原先想像咁大，港府唔好再錯放資源繼續做冇乜成效嘅大龍鳳，好應該實事求是咁將資源放喺有迫切需要方面。

之但係衞生署署長林秉恩又係一貫卸得就卸，佢話除咗機場外，大部分口岸嘅防疫工作同內地政府有合作協議，仲好大口氣咁講到好似我哋做乜，佢哋都做乜。巴閉咯，係咪真係咁有牙力呀？

叮！林秉恩成日都口噏噏當秘笈o架啦，信佢半成都死呀。呢嗱，佢嘅頂頭上司食物及衞生局局長周一嶽已經口快快踢爆話，由於邊境口岸人流頻繁，要配合內地至調整到有關措施。講到尾，咪又係將個責任卸番畀內地！

有冇搞錯呀，防疫把關咁大件事，下下都要咁被動靠人，仲使乜咁高人工請成班廢官返嚟行行企企等運到？依家話就話當局會同內地有關部門商討研究調整防疫措施，查實又係拖字訣，到目前為止，仍然未有時間表o架。

叮佢個鎯鎯，港府嘅防疫工作應緊張嘅唔緊張，唔應該緊張嘅就緊張過龍。睇番豬流感爆發初期，成班官後知後覺，對呢個新疫症闊佬懶理，結果唔使多講，大家有目共睹，各個口岸中門大開，搞到豬流感長驅直入。

好嘞，直到有首宗外地傳入嘅感染個案，衞生署至如夢初醒，忽然如臨大敵，高調下令封鎖灣仔維景酒店一星期，嚇到外國旅客以為香港變咗疫埠。叮！呢啲咪叫過猶不及囉。

成班官一味只係識做「清潔騷」，一日清潔百日污糟有鬼用咩，睇睇大街小巷垃圾堆積如山，想唔爆發疫情就奇。當局依家做完一輪騷後明顯放軟手腳，好似話嗰個健康申報表措施，完全係得個樣，睇下收表嗰班前線人員，望都唔望就收，抽查更加少之又少，健康申報基本係形同虛設。

有專家警告，豬流感病毒殺傷力雖然不大，但傳播力極強，唔可以掉以輕心。再加上同時流行多種流感病毒，如果出現洗牌效應，咁就大件事。弊在有個只係識得頭痛醫頭、腳痛醫腳嘅政府，小市民想健健康康，都係自求多福好啲。