小白觀點

香港「美食家」獨步全球

大馬旅遊部長理直氣壯咁話海南雞飯、辣椒蟹、肉骨茶同叻沙都係佢哋嘅特產，準備申請專利將之列為「馬來西亞美食」。香港成日話自己係美食天堂，咁我哋有乜嘢獨家首創嘅陀地嘢可以申請專利呢？

香港人千祈唔好學揚州咁，窩裏鬥霸到個炒飯就滿足，梗係要槍口對外啦。所以旅遊發展局好應該出嚟宣布，為「美食家」Gourmet一詞申請專利，因為走勻全世界，冇人可以好似香港食家咁，食得出海南雞飯有海南雞飯味、辣椒蟹有辣椒蟹味、肉骨茶有肉骨茶味，你試吓畀舊乜佢吖，對住鏡頭一樣食得津津有味，舔住手指大讚從來冇食過咁有乜味嘅美食，你估易㗎？

網址：www.sunsiupak.blogspot.com

網友觀點......

working class hero

搞美食維權好呀，起碼唔使畀人拉去坐監嘛……

mw

香港好多美食可以申請專利啦，菠蘿油、車仔麵、絲襪奶茶全部都係，手快有手慢冇。

GiGi

肉骨茶肯定唔係星洲美食啦，煲呔曾想去食，只係食到一面屁咋。

志文反局

好多中產人士都去食物銀行攞嘢食，唔知算唔算係「首創」呢？

卜勤

香港勝在有ICAC「廉記咖啡」。

尖子

咩呀，茶餐廳夠晒出名啦，直頭係非物質文化遺產呀！

Patrick Lai

弊在所有有香港「特色」嘅食品，全部都係平價貨呢，賺唔到啲老外幾多錢㗎喎！

sue ee

嘩，你知唔知旺角啲小食店一個月可以賺幾多？平價小食感覺係平易近人，好容易食得到，而海南雞飯、辣椒蟹、肉骨茶都唔係平價貨。

阿豪觀點

幫香港腳申請專利好過

馬來西亞旅遊部長計劃將海南雞飯同辣椒蟹等申請專利，將佢哋列為「馬來西亞美食」，豪伯認為，呢個行為相當之無聊。大家諗吓嘞，就算畀佢哋成功申請到專利，而鄰國新加坡仍然有舖頭打正旗號賣「地道辣椒蟹」，唔通真係發動戰爭咩！

所以計我話，香港雖然有茶餐廳奶茶等多種美食，但係申請成專利都冇乜着數，要申請專利，不如為「香港腳」申請好過。大家都知啦，呢種皮膚病又唔係香港發明，但係我哋就無端端背負呢個惡名咁耐，倒不如將錯就錯，將佢列為「香港原創疾病」，邊個外國人患上，一係就收佢「專利費」，一係就規定用本港藥廠出嘅藥物，咁樣先至啱數！

網址：www.lukchiho.blogspot.com