舊年立法會改選後，兩名波牛議員「IT豪」譚偉豪同林大輝進身議會，立即運用佢哋喺外面搞開專業足球隊嘅經驗，對立會足球隊進行大改革，仲身體力行落場踢埋一份，最終成功搞活番成隊波，令議員嘅出賽率從谷底回升，並曾經歷史性咁出現十一名議員同時落場嘅盛況，足球隊亦喺過去一年開出五戰五勝嘅無敵戰績。
但如果大家有真正落場睇過佢哋踢波，就會發覺真正踢得嘅大多係領隊IT豪同隊長大輝及喺外面請番嚟嘅外援，令對手輸咗都唔得心服口服，質疑佢哋靠外援贏波。
IT豪亦好老實咁講，情況好唔理想，需要自我檢討。佢話會嘗試約班議員隊友進行地獄式集訓，苦練死球戰術同底線傳中，大家夾熟啲先再正式上場搏殺喎！