好多打工仔都期待政府盡快落實最低工資，而立法最具爭議嘅係最低工資定喺邊個水平，負責制訂首個最低工資水平嘅臨時最低工資委員會唔敢怠慢，唔理勞工顧問委員會討論最低工資時已考察過其他國家嘅實際情況，委員會呢個禮拜六就會出發去法國同英國實地考察，見吓當地相關嘅法定諮詢組織、商會同工會，參考吓情況。
呢次行程話就話去九日，但扣除搭飛機嘅時間，實際每個地方只係去三日，除咗主席鄭若樺外，其餘十二位商界、學術界、勞工界同政府成員個個都係大忙人，只係得第二站英國行程最齊人。
首站法國好似有四分之一成員去唔到，包括新鴻基地產副主席郭炳江，佢為咗早前環球貿易廣場單六死工業意外已搞到頭都大埋，但仍百忙之中抽空飛去第二站英國行程，可見佢為保障工人點都出一分力。
而負責呢條草案嘅官方代表勞工及福利局常任秘書長鄧國威，亦只係去英國站。據聞，政府傾向參考英國做法，唔通常秘因為呢個原因，覺得法國嘅最低工資制度唔值得參考？